tirsdag 30. juli 2013

Trøffelkake



Trøffelkake er ei kake som er blitt ein klassikar i vår familie. Du kan vel seie at dette er ei "finare" sjokoladekake som høver godt til servering i til dømes bursdagar, bryllaup og dåpar. Med nydeleg smak av sjokolade og rom slår denne an hos både liten og stor :)

Ingrediensar

Kakebunn:
300 g sukker
3 store egg
100 g kokesjokolade
150 g smør
2 dl mjølk
300 g kveitemjøl
3 ts bakepulver

Sjokoladekrem:
150 g smelta smør
ca 500 g melis
200 g kokesjokolade
3 ss sterk kaffi
2 ss mjølk
ca 10 dråpar rom
1 egg


Visp egg og sukker saman til eggedosis, ca. 10 minuttar. Smelt kokesjokoladen saman med smøret og mjølka over svak varme i ein kjele eller i mikroen. Avkjøl og rør inn i eggedosisen. Sikt i dei tørre ingrediensane og rør forsiktig til ein smidig kakedeig. Ha deigen i ein rund kakeform (26 cm diameter) med bakepapir i bunnen. Steik kaka på nederste rille i omnen på rist i 45 minuttar på 175 grader. Avkjøl kaka i forma. 


Lag sjokoladekrem ved å smelte smør og sjokolade i ein kjele. Rør i kaffi og mjølk og deretter melisen. Ta kjelen av plata og rør inn egget slik at kremen blir blank og smidig. Smak til med romessens og sett kjølig til kremen har fått passe tjukk konsistens. 




Del kakebunnen i tre delar. Eit tips er å sette kakebunnen i frysaren ein liten time før du skal pynte den; då vil det ikkje være så mykje "smular"når du arbeidar med kaka.




Dynk gjerne kaka med mjølk for å få den saftigare. Fordel sjokoladekrem mellom kvar kakebunn




Smør resten av sjokoladekremen over kaka. 





Trøffelkaka kan til dømes pyntast med Kvikk-Lunsj-sjokolade og kakestrøssel, som på biletet øvst. Eller som her med Non-Stop-sjokolade  Det enklaste er berre å bruke ein gaffel og lage bølgemønster i glasuren.









onsdag 17. juli 2013

Grahamsrundstykker

Som namnet tilseier inneheld desse rundstykkene hovudsakleg grahamsmjøl. Amerikanaren, Sylvester Graham (1795- 1851) som mjølet er oppkalt etter, var forut for si tid og meinte at eit vegetarisk kosthald og grovt brød var sunt. Han utvikla derfor ei kornblanding der alle bestanddelane av kornet var med, grahamsmjøl. I dag kjenn me mjølet som sammale kveitemjøl.

Mykje godt kan bakast av grahammjøl, som til dømes, kjeks, scones, tekaker, boller, brød og paier. Eg prøvde meg på rundstykker og tykte dei var kjempegode. Eit pluss at dei i følgje brødskalaen er ekstra grove :)







Ingrediensar

(ca. 20 stk)

450 g Grahamsmjøl/ sammale kveitemjøl
300 g fullkorn kveitemjøl
50 g fersk gjær/ 1 pk tørrgjær
0,5 dl sirup
2 ts salt
4,5 dl mjølk
75 g smør eller margarin







Framgangsmåte

Varm melken til 37 grader (fingervarmt). Smule gjæren dersom den er fersk, i en bakebolle. Ha i melken og rør saman. Tilsett de øvrige ingrediensene, men held igjen smøret. Spar 1 dl kveitemjøl til utbakingen. Elt deigen i kjøkenmaskin i ca. 5 min. før du tilsett romtemperert smør/margaring i bitar. Elt i ytterligare 5-10 minuttar (ta evnt. meir mjøl) til deigen er smidig.
La den heve i ein bakebolle tildekka med plast eller lokk i ca. 45 minuttar. 




Elt deigen smidig med mjøl på eit bakebord. Del deigen i ca 20 emner, trill dei til runde bollar og trykk dei gjerne litt flate. Legg dei på bakebrett, smurde eller med bakepapir. 



 La dei etterheve i ca. 45 minuttar. Pensle med vatn og strø over solsikke-/ valmue-/ sesam-/ gresskarfrø om ønskeleg. Steik rundstykkene midt i omnen på 225 grader i 10-12 minutter. 


Avkjøl på bakerist.

tirsdag 16. juli 2013

Vibekes pastasalat med kylling

At det bur mange driftige damer i Øyane, nærare bestemt det me kallar Vedholmen, veit me veldig godt. Kjem ein på besøk der blir det alltid diska opp med gode, heimelaga rettar. Ikkje få gongar me har reist derifrå med ei ny matoppskrift i handa! Dagens oppskrift fekk me for mange år sidan frå vår gode veninne Vibeke. Ho er ein av dei me sikta til når me snakka om driftige VedholmsdamerJ  Me har fleire gode oppskrifter på lur frå henne.. 
Dagens salat smakar aldeles nydeleg og kan anbefalast på det varmaste. Den passar veldig godt på eit koldtbord, tapasbord, eller som ein enkel og god rett aleine. Har du det travelt den dagen du har tenkt å servere salaten, kan du godt lage den dagen i førevegen. Den er likså god da. Dersom den virkar litt tørr er det berre å blande i litt meir rømme/majones.

ca. 8 personar

Ingrediensar

1 boks cherrytomatar
1 hjertesalat evt. 1/2 kinakål
1 paprika
3-4 fedd kvitlauk
1/2-1 raudlauk
1-2 boksar mais
500g pastaskruar
2 beger lett rømme
1 majones
kyllingkrydder
salt
pepar
1 pakke kyllinglår evt. 1 ferdiggrilla kylling 

I



Her ser du ingrediensane me brukar og passe storleik på det som skal hakkast opp:)



Da er det berre til å setje i gang:)


Framgangsmåte



Start med å blande rømme og majones i ein stor bolle. Bruk kvitlaukspresse til å presse kvitlauken med. Tilsett dette i rømmeblandinga saman med kyllingkrydder, salt og pepar. Det går med mykje kyllingkrydder. Når du er fornøyd med smaken er det berre til å blande i alt det andre. Bileta under viser vår framgangsmåte.



Kok pasta som anvist på pakken. Avkjøl pastaen med litt rennande kaldt vatn. Tøm det i rømmeblandinga.



Sil laken av maisen og tilsett.



Raudlauken hakkast i små bitar. 



Ta skinnet av kyllingen og rens den for bein etc. Del den opp i passe bitar. Me er ikkje begeistra for skinnet og lar derfor vere å tilsetje dette.



Skjær salaten opp i passe strimler og tilsett.


Paprika hakkast i passe bitar


Del cherrytomatane i 2-4 bitar. Desse tilsett me på toppen rett før servering, då blir dei litt som pynt.




Server gjerne med nylaga brød som foccacia eller dette eltefrie brødet.  



mandag 8. juli 2013

Pavlova/ marengskake

Pavlova er enkelt og greit ei knallgod margenskake. Kaka er oppkalt etter ei russisk ballettdanserinne, Anna Pavlova, og er florlett og luftig kake. Når me lagar denne herligheten tykkjer me det er friskare og betre og blande kremen med melonyoghurt i staden for vaniljekrem. Uansett kva du nyttar, smakar det kjempegodt :)


Ingrediensar

Marengsbunn:
6 stk eggekviter
300 g sukker
2 ts kvitvinseddik
1 ts maisstivelse (maizena)

Fyll:
1 pk piska kremfløyte
2 ss sukker
1 stk stor melonyoghurt/ 1 pk ferdig vaniljekrem
Bær og frukt etter sesong



Visp romtempererte eggekviter til hardt skum i ein rein bakebolle. Tilsett eddiken og deretter sukker og maismjøl litt etter litt medan du vispar. Når massen er blank og smidig har du den over på bakepapir. Tips! Ha litt olje eller smør på bakebrettet før du har på bakepapir; då sit papiret fast medan du smører marengsen utover. Du kan anten tegne ein sirkel på diameter ca. 26 cm eller smøre den utover til eit rektangel med ca. 2,5 cm høgde. Porsjonsstorleikar er også praktiske å lage.

Steik bunnen på 160 grader i ca. ein time på under- og overvarme. Du kan godt senke temperaturen men då må du la den stå lenger inn i omnen. Marengsen skal være sprø og ha ein lys kremfarge. La den stå i omnen til den er avkjølt.  Marengsbunnen kan lagast fleire dagar i forkant og oppbevarst tørt i eit handklede. 


Pisk fløyte saman med sukker. Bland yoghurten saman med kremen. Dersom du nyttar vaniljekrem er det greit å ikkje blande kremane, men smøre dei på lagvis. Smør kremen utover marengsbunnen og pynt med det du har av bær/ frukt. Ekstra godt er det å ringle himmelsk pistasjkrem over som du bl.a får kjøpt hos Oliviers & Co ( endeleg i Bergen) eller du kan lage sjølv. Vonar me snart har oppskrifta på bloggen ;o) 


torsdag 4. juli 2013

Sommarsalat


Salat er lett og god mat til varme sommardagar. Det som også er så greitt er at ein kan variere salaten etter kva ingrediensar ein har tilgjengeleg. Ein kan velje ein vegetarisk variant eller gjere den meir mettande ved å tilsetje kjøtt eller fisk. Tenkte å dele ein variant med kylling, bacon og mykje gode grønsaker. Denne salaten passer godt anten du sit i hagen, på veranda eller er nede ved bryggja på late sommardagar der maten skal vere lettfordøyeleg og enkel å frakte med seg.





6 personar

Ingrediensar

§       4-5 kyllingfiletar
§      1-2 pakkar sliset bacon
§      3-4 egg
§      Blanda salat  som ruccola, frisè, hjertesalat etc.
§      1 pakke cherry tomatar
§      1 boks salatbønner
§      1 boks pinjekjerner
§      1 mango
§      1 avokado
§       ½ raudlauk
§       1 paprika


Framgangsmåte

Om ein startar med det eine aller andre går dette for det same. Det som kan vere greitt å hugse på når du skal ”dandere” salaten  i skåla, og for at det skal sjå innbydande ut er å starte med den grøne salaten nederst og fordele dei andre ingrediensane på toppen utan og røre for mykje rundt. Strø pinjekjernene over til slutt.






1.     Steik baconet. Legg det deretter på tørkepapir slik at fett renner av.
2.     Skjær kyllingen i strimler og steik dei gylne.  Dette tar berre eit par minuttar. Det einaste krydderet me brukar under steiking er kyllingkrydder.
3.     Kok egga i  ca. 7 min. (plommen skal akkurat ha begynt å sette seg). Avkjøl dei i kaldt vatn. Skrell og del dei i 2-4 delar.
4.     Vask og tørk salaten godt. Riv salaten i mindre bitar og legg den nederst i salatskåla.
5.     Vask og del tomatane i to.
6.     Skyl lake av salatbønnene
7.     Skjær mangoen i terningar
8.     Avokado, paprika og raudløk deles opp.
9.     Rist pinjekjernene gylne i varm steikepanne i ca. 1 min.

Med litt god, heimelaga kvitlauksdressing (som du finn oppskrift på her) og nybaka brød kan denne salaten like godt som lunsj fungere som eit middagsmåltid.




Velbekomme!

onsdag 3. juli 2013

Rolf Tores kvitlauksdressing

Svogeren vår er kjempeflink på kjøkenet og diskar opp med dei lekraste rettar. Kvitlauksdressingen hans er kjent i slekta og den blir nytta både tidt og ofte. Den høver til så mangt så bruk den til dømes over ein salat, som dipp eller som innslag på tapasbordet.

Ingrediensar

3 ss majones
3 ss creme fraiche eller rømme
1 ts kvitvinseddik
1 ts sukker
1 fedd kvitlauk, pressa

Rør alt saman og smak til med litt salt og pepar. Sett kjølig før servering.

Lag gjerne dobbel oppskrift for denne blir garantert populær :)

tirsdag 2. juli 2013

Eltefritt brød/ No-knead bread

Dette er ein "idiotsikker" måte å bake brød på, og alle som er redde for å ta fatt på tradisjonell gjærbakst bør absolutt prøve eltefritt brød eller "no-knead bread" som det vert kalla på engelsk. Resultatet blir alltid vellukka :)  Brødet har allereie stor følgjarskare i USA og har no innteke Noreg med stor suksess. Brødet er utruleg enkelt å lage, er luftigare og mindre kompakt enn vanlege"butikkbrød".

Mykje vatn, lite gjær og tid er magien med eltefri brødbaking. Du får ein mykje våtare deig, glutenstrukturen får då bevege seg, og når deigen blir kvelva over i ein glovarm kasserolle og lokket satt på, blir deigen utsatt for ein eksplosiv varme som gjer at den hevar maksimalt.

Ingrediensar


500 gr kveitemjøl
1/4 ts tørrgjær
1 1/2 ts salt
4 dl vatn

Ha mjøl, salt og gjær i ein stor bakebolle og rør lett saman med ei sleiv. Ha vatnet over mjølblandinga og rør deigen saman. Dekk til bakebollen med plastfolie eller lokk og la den stå på kjøkenbenken til heving i 12-18 timar.
Deigen før den blir sett til heving


Deigen etter den har heva i 20 timar
Legg eit stykke bakepapir på kjøkenbenken. Strø på godt med mjøl. Kvelv deigen over på bakepapiret og ta gjerne ein slikkepott til hjelp. Strø deigen med mjøl viss den er veldig fuktig, og brett den saman. Filmen her viser en detaljert framgangsmåte på korleis brødet vert laga. Ta ein av kantane og brett den inn mot midten. Ta neste kant og gjer det same. Gjer dette opptil ti gongar til du byrjar å føle litt motstand i deigen og den held litt på forma. Strø gjerne toppen med litt mjøl innimellom viss deigen blir for klissete. Lyft opp deigen og legg den med bretten ned. Dekk den til. Har du stor nok bakebolle kan du ha den over deigen. La deigen heve i ca. 2 timar.

Sett ei ildfast form eller gryte med lokk i kald omn. Når brødet har heva i ca. 1,5 time, sett du omnen på 250 grader.

Ta den varme forma ut av omnen når deigen er ferdig heva. Lyft opp deigen vha bakepapiret og kvelv den opp i varme forma. Brettsida vender no opp. Om deigen har landa litt skeivt i forma, kan du riste den litt på plass.

Sett lokk på og sett forma inn i den varme omnen. Steik brødet i 30 minuttar. Ta av lokket og sett temperaturen ned til 220 grader. Steik i ytterlegare 15 minuttar.Ta brødet ut av forma og avkjøl det heilt på rist.


Pakkar du det inn i eit reint handklede, held det seg like ferskt og fint til neste dag.