Korleis sløye fisk

I sommar hadde me fleire flotte soldagar i Fitjarøyane, nærare bestemt Hatlevikjo der svigerfar kjem frå. I tillegg til soling, leite etter krabbe i fjæra, vere med på dugnad/vedlikehaldsarbeid, familiekos og seine kveldar med flott månenskin over heile ”leia” der dei store båtane ferdast, vart det også tid til fisking. 

Onkel Arvid (på bileta under) som er bror til svigerfar treff me ofte der ute. Han hadde fått både store og små fiskar denne dagen. På bryggekanten starta han sløyinga av fisken. Sjølvsagt vart småtrolla veldig engasjerte og følgde nøye med korleis han behandla fisken.

For ei strilajente som er oppvaksen ute i havgapet har det blitt ein del sløying av fisk, ikkje minst dei somrane me jobb ved "Akvakulturen" i Torangsvågen. Trur nok at mange av dei som fylgjer denne bloggen er mykje betre på sløying enn meg;) Med all respekt for alle dei dyktige fiskarane me har rund oss tor eg likevel å freiste meg "ut på" med å forklare korleis sløying av fisk kan gjerast. 

Det fyrste ein må gjera er å ”bløgga” fisken.

Bløgging betyr å kutte over blodårane som fører frå hjarta på fisken med kniv. Etter at blodårane er kutta over, legg ein fisken i kaldt vatn, og muskelkrampane hjelp til med å driva ut blodet. 

Det er viktig å få ut innmaten på fisken innan rimeleg tid og det er dette som blir kalla sløying.
Ein startar med å sprette opp buken på fisken, frå gjellene til "gattholet".

Ta eit godt tak rundt all innmaten, vri det rundt med den eine handa og kutt det av oppe med hovudet med ein god kniv. 

Skjær av hovudet og vask så fisken innvendig.

Fisken er då klar til filetering.

Onkel Arvid som også er oppvaksen i Hatlevikjo er gamal i "gamet" og kunne nok gjort dette i blinde:) Uansett, takk for ein illustrerande innføring i sløying av fisk, kjære onkel:)